အဖြူဆိုင် အဘိဓာန်

အဖြူဆိုင် အဘိဓာန်

ကျွန်တော် အဖြူဆိုင်ထိုင်ရတာကြိုက်တယ်။ အဖြူဆိုင်မှာ အောက်ခြေလူတန်းစားတွေရဲ့ ရိုးသားမှုကိုတွေ့နိုင်တယ်။ မာနတွေတွေ့နိုင်တယ်။ တစ်နေ့တာ လုပ်ငန်းအတွေ့အကြုံတွေ နာယူခွင့်ရတယ်။ ဒီထက်ကြီးကြီးပြောရရင် တစ်ဦးချင်းစီရဲ့ ဘဝဒဿနတွေရောပေါ့။ ဒီတော့ အဖြူဆိုင်ဆိုတာ ဘာလဲလို့ မေးရင် “အရက်ဖြူဆိုင်”လို့ ခေါင်းစဉ်တပ်ထားတဲ့ သူရာမေရိယကံကို တညီတညွှတ်တည်း ကျူးလွန်လို့ရတဲ့ ဆိုင်လေးပေါ့။ (အရင်တုန်းကတော့ သူတို့ရဲ့ နေရာကို “သမဆိုင်”လို့ခေါ်တဲ့ ဆိုင်ရာပိုင်ရာလူကြီးမင်းများက ခွဲတမ်းနဲ့ ရောင်းပေးတဲ့ ဆိုင်တွေက နေရာယူထားတယ်။) ဒီဆိုင်ဟာ ဘီယာဆိုင်မဟုတ်သလို တန်ဖိုးကြီးအရက်ပုလင်းတွေလည်းမရဘူး။ သူတို့ အဓိကရောင်းတာ “ဇေ” လို့ခေါ်တဲ့အရက်ရယ်၊ ချက်အရက်၊ဘီအီးအရက်လို့ခေါ်တဲ့အရက်ရယ်၊ အရက်ကြမ်းကြီးထဲကို လိမ္မော်နံ့ ၊နာနတ်နံ့တွေထည့်ပြီး ရောစပ်ထားတဲ့အရက်တွေပေါ့။ ဘာပဲသောက်သောက် တကယ်တော့အရက်ကြမ်းပါပဲ။ ကျန်းမာရေးထိခိုက်မယ်ဆိုတာမျိူးတွေလာမပြောနဲ့။ ဘီယာတစ်ခွက် (၈၅၀)ရှိတဲ့ ခေတ်မှာ ၁၀၀ဖိုးနဲ့ မူးဖို့ဆိုတာ ဒီအရက်တွေပဲရှိတယ်။ အကောင်းဆုံးအမြည်းက လက်ဖက်သုပ်ဖြစ်နိုင်သလို၊တန်ဖိုးကြီး Barတွေ Beer Pubတွေမှာမရနိုင်တဲ့ လမ်းဘေးကဖမ်းလာတဲ့ ကြွက်သားဟင်းလျာလည်းဖြစ်နိုင်တယ်။ ဒါမှမဟုတ် ကိုယ်ပိုင် လျက်ဆားပုလင်းနဲ့ လာတဲ့သူတွေလည်းရှိနိုင်တယ်။ဘာပဲဖြစ်ဖြစ် ဒီဆိုင်ကိုလာတဲ့ Customerတွေအားလုံးရဲ့ ဘုံရည်ရွယ်ချက်က သူတို့မှာပါလာတဲ့ Budgetနဲ့ ကိုက်ညီတဲ့ မူးယစ်ရီဝေမှုကိုခံစားဖို့ပဲ။ နောက်ဆုံးလစ်မစ်လိုသေးရင် ဘေးဝိုင်းကတောင်းသောက်မယ်။ ပြီးရင် စကားပြောကြမယ်။ ဆိုက်ကားဆရာကလည်း သူရဲ့ တစ်နေ့တာအတွေ့အကြုံတွေကို ဝိုင်းထဲမှာ ဝေမျှသလို သူရဲ့ Passenger တွေက သူ့ကိုဘယ်လိုဆက်ဆံတဲ့ အကြောင်းရင်ဖွင့်မယ်။ ပန်းရန်သမားကလည်း သူ့အလုပ်ခေါင်းဆောင် သူတို့ကို ဘယ်လိုခေါင်းပုံဖြတ်ကြောင်းပြောမယ်။ ပြီးရင် ဘဝဒဿနတွေအကြောင်းပြောမယ်။ ပစ္စည်းမဲ့လူတန်းစားရဲ့ မာနတွေအကြောင်းကို တခမ်းတနားပြောမယ်။(ချမ်းသာတဲ့လူတန်းစားတွေရှေ့မှာ သူတို့ပြောလည်း အရာမဝင်လို့)။ သူတို့တန်ဖိုးကို သူတို့ဖော်ထုတ်ပြမယ်။တစ်ယောက်နဲ့ တစ်ယောက်ဘယ်လောက်မိုက်ကြောင်း မိုက်ဂုဏ်ချင်းပြိုင်ကြမယ်။ ဒီထက်ပိုပြီးရေချိန်ကိုက်လာရင် သွေးဆိုးတဲ့သူက ရန်ဖြစ်ဖို့စဉ်းစားမယ်။ ရစ်တတ်တဲ့သူက အိမ်ပြန်ပြီး မိန်းမကိုပြန်ရစ်မယ်။ ဒီလောက်ပဲ။

သူတို့အားလုံးရဲ့ စိတ်ထဲမှာ ယုတ်မာကောက်ကျစ်မှုတွေမရှိဘူး။ နောက်ကျောကို ဓားနဲ့ မထိုးဘူး။ ပကာသနတွေမရှိဘူး။ မျက်နှာမှာ အပြုံးတပ်ပြီး မသိစိတ်က မယှဉ်ပြိုင်ဘူး။ ဒီအရက်ဖြူဆိုင်ထဲမှာ Grand Royalလို Royal Clubလို ဝီစကီကို တစ်တောင့်ထောင်နိုင်တဲ့ လူက အကောင်ပဲ။ သူတို့ အခေါ်အဝေါ်အရ “ကျားချင်းအတူတူတောင် ကိုးတောင်ကျား” ဖြစ်နေတဲ့ကောင်ပေါ့။ မတော်လို့ သူတို့ထဲက တစ်ယောက်ယောက်တိမ်းပါးသွားရင် နှစ်ပတ်လောက်သောက်ပြီး သူ့ရဲ့ အိုးစားဖက် နောက်ဆုံးခရီးကိုလိုက်ပို့မယ်။ “ဒီကောင် ကျားစီးပြီး အစာမှမကောက်တာ” လို့ မချိတင်ကဲနဲ့ လူတွေကို ရှင်းပြမယ်။ သူတို့အကြောက်ရဆုံးစကားက ဆိုင်ရှင်ရဲ့ မောင်းထုတ်ခြင်းကိုခံရတဲ့အချိန်နဲ့ အကြွေးမရောင်းတဲ့အချိန်။ ဒီအချိန်နှစ်ချိန်ကလွဲရင် ကျန်တဲ့ အချိန် ကမ္ဘာပျက်နေတောင် ဖြုံမယ့်သူတွေမဟုတ်ဘူး။

ဒီတော့ မိတ်ဆွေ ခင်ဗျားအရမ်းစိတ်ညစ်နေလား? ဒါဆို ကျွန်တော်အကြံပေးချင်တယ်။ ခင်ဗျားမှာ ပိုက်ဆံရှိလို့ ဘယ်Barမှာပဲ သောက်နိုင်သောက်နိုင် ရပ်ကွက်ဆင်ခြေဖုံးလေးထဲက အဖြူဆိုင်မှာ တစ်ခါလောက်တော့ သွားသောက်သင့်တယ်။ အဲ့ဒီမှာ ခင်များထက်ဆိုးတဲ့ ဒုက္ခတွေကို ထွေးပိုက်ထားတဲ့ လူအုပ်ကြီးကိုတွေ့ရလိမ့်မယ်။ ခင်ဗျားဒုက္ခတွေဟာ သူတို့နဲ့ယှဉ်ရင် သေးသေးလေးဆိုတာလည်း သဘောပေါက်လာလိမ့်မယ်။ ခင်ဗျားတော့ မသိဘူး။ ကျွန်တော်တော့ စိတ်ညစ်တိုင်း၊လူတွေရဲ့အပစ်ပယ်ခံရတိုင်း Grand Royal လေးထောင်ပြီး ကိုးတောင်ကျားတစ်ကောင်အဖြစ်နဲ့ သူတို့ရဲ့ အထင်ကြီးမှုကို ရယူပြီး “သူရာဒါန”သွားလုပ်တယ်။ အထူးသတိပြုစေချင်တာက Ballentineတို့ Black Labelတို့ကိုင်ပြီးသွားထိုင်တာမျိူးတော့ မလုပ်စေချင်ဘူး။ ဒါဟာ အဖြူဆိုင် စည်းကမ်းကို ချိူးဖောက်ရာရောက်သလို ကိုးတောင်မပြည့်တပြည့်ကျားဘဲကြီးတွေကို စော်ကားရာလည်း ရောက်လို့ပါပဲ။

Credit -MinMinOo

Close Menu