🔺❝ဘုရားရှိခိုး၊ ပုတီးစိပ်၊ မေတ္တာပို့ရုံနဲ့တင် ရောင့်ရဲမနေနဲ့❞

🔺❝ဘုရားရှိခိုး၊ ပုတီးစိပ်၊ မေတ္တာပို့ရုံနဲ့တင် ရောင့်ရဲမနေနဲ့❞

အပါယ်တံခါး ထာဝရပိတ်သွားတယ်ဆိုတာ
အနည်းဆုံး သောတာပန်ဖြစ်ပါမှ ဖြစ်မယ်။
သောတာပန်ဖြစ်သွားရင်ပဲ
အပါယ်မျိုးစေ့ ပျက်စီးသွားပြီ။
ရင်ထဲမှာ လုံးဝကင်းရှင်းသွားအောင်ကို
မဂ်က ရှင်းလိုက်တာ
ဘယ်တော့မှ အပါယ်မကျတော့ဘူး။

ဒါကြောင့် ဒါနကုသိုလ်နဲ့လည်း မကျေနပ်ပါနဲ့။
သီလကုသိုလ်နဲ့တင် အားရမနေနဲ့။
ဘုရားရှိခိုး၊ ပုတီးစိပ်၊ မေတ္တာပို့ရုံနဲ့တင်
တင်းတိမ်ရောင့်ရဲမနေနဲ့။
ဝိပဿနာပွားများပြီး
မဂ်ဥာဏ်ရမှ စိတ်အေးရမှာပါ။

■■■

🔺❝ ကိုယ့်တရားက စောင့်ရှောက် ❞

“ဓမ္မောဟဝေ ရက္ခတိဓမ္မစာရီ”

ဘဝမှာ အစောင့်အရှောက်ကောင်းကောင်း
လိုချင်တယ်ဆိုရင် တရားရှာရပါမယ်။
အားကိုးအားထားရာ အစစ်အမှန်ကို
ရှာမယ်ဆိုရင် တရားရှာရပါမယ်။
အိုခြင်းတရား၊ နာခြင်းတရား၊
သေခြင်းတရားတွေနဲ့ တွေ့ကြုံလာချိန်မှာ
တရားရှိသူနဲ့ တရားမရှိသူ
ဘယ်နည်းနဲ့မှ မတူနိုင်ပါဘူး။

ကိုယ်ကျင့်ထားတဲ့တရား၊
ကိုယ့်မှာရှိတဲ့ တရားကမှ
ကိုယ့်ကိုပြန်ပြီး စောင့်ရှောက်လို့ရမှာပါ။

■■■

🔺❝ အမြင်မှား ❞

ပစ္စည်းဥစ္စာ ဆိုတာ
ကံပေးတဲ့အချိန်အခါမှာ ရလာတာမျိုးပါ
အကြောင်းကံတွေ ကောင်းလာတဲ့အချိန်မှာ
ကိုယ့်လက်ထဲကို ရောက်လာခဲ့တယ်။

ကံအကြောင်းတရားတွေ
ပြောင်းလဲသွားပြီဆိုရင်
ဒီ ပစ္စည်းဥစ္စာတွေသည် ကိုယ့်လက်ကနေ
တစ်ခြားသူလက်ကို ပြောင်းသွားပါတယ်။

ကိုယ့်ဆီရောက်လာတော့လည်း သူများလက်ထဲကနေ
ကိုယ့်ဆီ ရောက်လာတာပါ
အဲဒီလိုပဲ ကိုယ့်ဆီကနေပြီးတော့လည်း
သူများလက်ထဲ ပြန်ရောက်သွားတတ်ပါတယ်။

တစ်ယောက်ပြီးတစ်ယောက်
တစ်ဦးပြီး တစ်ဦး
လက်ကူး၊ လက်ပြောင်းပြီးတော့
ခေတ္တခဏ ပိုင်ဆိုင်နေကြရတာမျိုးပါ ။

တကယ်တမ်း တစ်ဦးတည်း ပိုင်တယ်ဆိုတာ
ဘုန်းကြီးတို့ ပရိတ်သတ်မှာ မရှိပါဘူး…

တစ်ခါတစ်ခါ ဘုန်းကြီးစဉ်းစားမိတယ်
ကိုယ်ပိုင်မြေ၊ ကိုယ်ပိုင်အိမ် လို့သာ ပြောတယ်
လူသားတွေနေကြတဲ့ ကမ္ဘာမြေဆိုတာ
လွန်ခဲ့တဲ့ နှစ်သန်းပေါင်းများစွာကတည်းက
ဖြစ်တည်ခဲ့တဲ့ အရာဝတ္ထုပါ…

ဒီ မြေကြီးပေါ်မှာ နေသွားကြတဲ့သူတွေ
ကိုယ့်ရှေ့က ဘယ်နှစ်ယောက်နေသွားပြီးပြီ
ဘယ်နှစ်ဆက် နေသွားပြီးပြီ ဆိုတာ မှန်းဆလို့
တွက်လို့တောင်မှ မသိရပါဘူး … ။
ကိုယ်နေတဲ့မြေပေါ်မှာ လူသားတွေ
ဘယ်နှစ်ဆက်နေလို့ ဘယ်နှစ်ဆက် သေသွားကြပြီဆိုတာ
ရေတွက်လို့တောင်နိုင်မှာ မဟုတ်ပါဘူး။

အခုလည်း `ငါပိုင်တယ်၊ ငါပိုင်တယ်´
လို့ပြောနေတယ်
ငါ့ရဲ့ကိုယ်ပိုင်၊ ငါ့ရဲ့ကိုယ်ပိုင်လို့
ပြောနေတယ် ။

ပြောရင်းပြောရင်း ကနေပြီးတော့
နောက်နှစ်ငါးဆယ်၊တစ်ရာကျလို့ရှိရင်
ကိုယ်လည်းပဲ ဒီမြေပေါ် ၊ ဒီအိမ်ပေါ် ရှိဦးမလား
ဆိုရင် မရှိနိုင်တော့ဘူး။
နောက်တစ်ယောက် ပြောင်းလာမှာ၊
ရောက်လာမှာပါပဲ…။

အဲဒီလို တစ်ယောက်ပြီးတစ်ယောက်
လက်ဆင့်ကမ်းပြီး ၊ လက်ဆင့်ပြောင်းပြီးသွား
နေတဲ့ ပစ္စည်းဥစ္စာတွေကို
ငါပိုင်တယ်လို့ မြင်နေရင် အမြင်မှားသာ
ဖြစ်ပါလိမ့်မယ် ….။

■■■

🔺❝ ငါနဲ့ ငါသာ ယှဉ်ပြိုင်ပါ ❞

သူများနဲ့
ယှဉ်ပြိုင်တယ်ဆိုတာ
မပြိုင်တတ်ရင်
အန္တရာယ်ကြီးပါတယ်။
အကောင်းဆုံးကတော့
` မနေ့ကငါနဲ့ဒီနေ့ငါ
ဘယ်သူသာသလဲ ´ လို့
ပြိုင်တာပဲကောင်းပါတယ်။

`ငါ့မှာသီလသမာဓိပညာတွေ
ဘယ်လောက်တိုးတက်လာသလဲ။
လောကီ လောကုတ္တရာ
အရည်အချင်းတွေ
ဘယ်လောက်တိုးတက်အောင်
ဆည်းပူနိုင်ခဲ့သလဲ။

ကုသိုလ်ကောင်းမှုတွေ
အရင်နဲ့ အခုဆို
ဘယ်အတိုင်းအတာထိ
တိုးတက်ပြီလဲ ´ လို့
ယှဉ်ကြည့်တာ
ပြိုင်ကြည့်တာ
မလွဲမှားနိုင်၊ မချွတ်ချော်နိုင်တဲ့
ယှဉ်ပြိုင်မှုပါ။

✰ ဒီလိုပြိုင်ပွဲမျိုးက
မကြာခဏ
ပြိုင်ရမယ့် ပြိုင်ပွဲပါ။

【 ဆရာတော် ဓမ္မဒူတ ဒေါက်တာအရှင်ပညိဿရ 】

❝ အပ္ပမာဒေန သမ္မာဒေထ ❞
☘ရွှင်လန်း☘ချမ်းမြေ့☘ပါစေ☘